बाब्बो.. म्हणून अमेरिका अफगाणिस्तानला देणार तब्बल 30 कोटी डॉलर; जाणून घ्या, नेमके कारण..

नवी दिल्ली : अफगाणिस्तान मध्ये तालिबानी राजवटीत देशाची अवस्था अतिशय खराब झाली आहे. तालिबानने सरकार गठीत केले असले तरी पैसे नसल्यामुळे देश चालवायचा कसा, असा प्रश्न आहे. तालिबान्यांच्या सध्याच्या कारवायांमुळे जगाने मदतीचे दरवाजे बंद केले आहेत. अशा परिस्थितीत आता अमेरिकेनेच अफगाणिस्तानला मदत करण्याचा निर्णय घेतला आहे. आधी अमेरिकेने मदत देण्यास नकार दिला होता. आता मात्र, मानवतेच्या आधारावर अफगाणिस्तान मधील नागरिकांसाठी 30.8 कोटी डॉलर अतिरिक्त मदत देणार असल्याचे अमेरिकेने जाहीर केले आहे. याआधीही अमेरिकेने अफगाणिस्तानसाठी मदत जाहीर केली होती.

अफगाणिस्तान मधील लोकांच्या कल्याणासाठी हे पैसे खर्च करण्यात येणार असल्याचे अमेरिकेने म्हटले आहे. अमेरिकेने अफगाणिस्तान मधून बाहेर पडण्याचा निर्णय घेतल्यामुळे आज या देशात अशी परिस्थिती निर्माण झाली आहे. तालिबानी राजवटीत येथील नागरिकांचे अत्यंत हाल होत आहेत. तालिबानच्या या कारवायांवर जगानेही मौन साधले आहे. काळजी व्यक्त करण्या पलीकडे फारसे काहीही होत नाही. या देशातील सध्याची परिस्थिती पाहता जागतिक वित्तीय संस्थांनी मदत देण्यास नकार दिला आहे.

या बदललेल्या राजकारणाचा फायदा घेत चीनने अफगाणिस्तानला तब्बल 310 लाख अमेरिकी डॉलर मदत देण्याची घोषणा काही दिवसांपूर्वी केली होती. त्यानंतर आता परिस्थिती ओळखत अमेरिकनेही अफगाणिस्तानला मदत देण्याचा निर्णय घेतला होता. अमेरिकेकडून अफगाणिस्तानला 64 मिलियन म्हणजेच 6 कोटी 40 लाख डॉलर्स पाठवण्यात येणार होते. त्यानंतर आता पुन्हा मदतीची घोषणा केली आहे.

प्राथमिक स्वरुपात ही मदत आहे. येथील परिस्थिती पाहून आधिक मदत करण्याबाबत निर्णय घेण्यात येईल, असे अमेरिकेने म्हटले आहे. अमेरिकेने अद्याप तालिबानी सरकारला मान्यता दिलेली नाही. सध्या तालिबानचा संपूर्ण देशावर कब्जा आहे. त्यामुळे अमेरिकेने ज्या उद्देशाने आर्थिक मदत देण्याची घोषणा केली आहे, तो उद्देश खरेच सफल होणार का, हा मोठा प्रश्न आहे. कारण, तालिबानच्या सध्याच्या कारवाया पाहता असे शक्य होईल, याची शक्यता कमीच आहे.

अमेरिका आणि चीन कोरोनाने हैराण..! चीनमध्ये आणखी एका शहरात कठोर लॉकडाऊन; जाणून घ्या अपडेट