मुंबई – ऑस्ट्रेलियाच्या पाकिस्तान दौरा (Australia’s tour of Pakistan) धोक्यात दिसत आहे. मीडिया रिपोर्ट्सनुसार, ऑस्ट्रेलियन खेळाडूंनी पाकिस्तानमधील सुरक्षा व्यवस्थेबाबत चिंता व्यक्त केली आहे. या देशात नुकत्याच झालेल्या दहशतवादी हल्ल्यांबाबत खेळाडूंनी चिंता व्यक्त केली आहे. ऑस्ट्रेलियन संघ 1998 नंतर प्रथमच पाकिस्तानच्या दौऱ्यावर जात आहे. फेब्रुवारी-मार्चमध्ये दोन्ही संघांमध्ये दोन कसोटी, तीन एकदिवसीय आणि तीन टी-20 आंतरराष्ट्रीय सामने खेळविण्यात येणार आहे.
ऑस्ट्रेलियन वृत्तपत्र सिडनी मॉर्निंग हेराल्डने दिलेल्या माहितीनुसार ऑस्ट्रेलियन खेळाडूंनीही ही मालिका पाकिस्तानऐवजी संयुक्त अरब अमिरातीमध्ये (यूएई) आयोजित करण्याची मागणी केली आहे. ऑस्ट्रेलियाचे निवडकर्ते जॉर्ज बेली यांनी बुधवारी पत्रकारांना सांगितले की, सुरक्षा व्यवस्था अतिशय कडेकोट आहे. या दौऱ्याची छोटी-छोटी माहिती गोळा करण्याचे काम दोन्ही बोर्ड करत असल्याचे त्यांनी सांगितले.
जॉर्ज बेली म्हणाले की सुरक्षा यंत्रणेला बोर्डाची औपचारिक मान्यता मिळाल्यावर आम्ही संघाची घोषणा करू. मात्र, अद्याप याबाबत कोणतीही माहिती नसल्यामुळे आपण काही बोलू शकत नाही. गेल्या काही महिन्यांत काही आंतरराष्ट्रीय संघांनी निश्चितपणे पाकिस्तानचा दौरा केला आहे. यामध्ये झिम्बाब्वे आणि वेस्ट इंडिजने नुकताच पाकिस्तानचा दौरा केला आहे. मात्र, गेल्या वर्षी टी-20 विश्वचषकापूर्वी न्यूझीलंड आणि इंग्लंडसारख्या संघांनी सुरक्षा व्यवस्थेमुळे दौरा रद्द केला होता.
त्याचबरोबर अफगाणिस्तानमध्ये तालिबानच्या ताब्यामुळे सुरक्षा व्यवस्थेची चिंता वाढली आहे. पाकिस्तानच्या स्थानिक प्रसारमाध्यमांनी दिलेल्या माहितीनुसार, देशाचे गृहमंत्री शेख रशीद यांनीही कबूल केले आहे की, अमेरिकेने अफगाणिस्तानातून सैन्य मागे घेतल्यापासून पाकिस्तानमध्ये दहशतवादी घटनांमध्ये एक तृतीयांशपेक्षा जास्त वाढ झाली आहे.
