IPL पूर्वीच गुजरात टायटन्सला धक्का; ‘या’ स्फोटक फलंदाजाने अचानक घेतली माघार
मुंबई – इंडियन प्रीमियर लीगच्या (IPL 2022) 15व्या हंगामाला सुरुवात होण्यापूर्वी गुजरात टायटन्सला मोठा धक्का बसला आहे. लीगच्या नवीन फ्रँचायझीचा स्फोटक फलंदाज जेसन रॉय (Jason Roy) याने आपले नाव मागे घेतले आहे. स्टार इंग्लंडच्या सलामीवीराने बायो बबलच्या समस्येचे कारण देत लीगमधून माघार घेण्याचा निर्णय घेतला आहे.
सनरायझर्स हैदराबादचा भाग असलेल्या रॉयला या लिलावात गुजरातने त्याच्या मूळ किंमत दोन कोटींमध्ये विकत घेतले. रिपोर्ट्सनुसार, रॉय यांनी गेल्या आठवड्यात अहमदाबादस्थित फ्रँचायझीला त्यांच्या निर्णयाची माहिती दिली होती. मात्र संघाने अद्याप त्याच्या बदलीची घोषणा केलेली नाही.
जेसन रॉयसोबतची ही दुसरी वेळ आहे की त्याने टी-20 लीगमधून बाहेर पडण्याचा निर्णय घेतला आहे. यापूर्वी 2020 मध्ये देखील, त्याने दिल्ली कॅपिटल्सचा भाग असताना वैयक्तिक कारणांमुळे आपले नाव मागे घेतले होते.
Kharediwala घेऊन आलोय आलेय इंडियन ईकॉमर्स..!
रॉय अलीकडेच पाकिस्तान सुपर लीगमध्ये (PSL) क्वेटा ग्लॅडिएटर्सचा भाग होता आणि येथील सहा सामन्यांमध्ये तो संघाचा सर्वाधिक धावा करणारा खेळाडू होता. त्याने 50.50 च्या सरासरीने आणि 170.22 च्या स्ट्राइक रेटने धावा केल्या आहेत.
आयपीएलमध्ये या हंगामात एकूण 10 संघ सहभागी होत आहेत. 26 मार्च ते मे अखेरपर्यंत सुमारे दोन महिने ही लीग आयोजित केली जाईल. यामध्ये गुजरातची कमान हार्दिक पांड्याकडे असेल, तर संघात राशिद खान, शुभमन गिल, डेव्हिड मिलर या खेळाडूंचा समावेश आहे.