T-20 Cricket : श्रीलंका विरुद्धच्या सामन्यात भारतीय संघ आणि खेळाडूंचे झाले हे विक्रम
मुंबई : धर्मशाला येथील एचपीसीए स्टेडियमवर खेळल्या गेलेल्या तिसऱ्या आणि शेवटच्या T20 सामन्यात भारताने श्रीलंकेने दिलेले १४७ धावांचे लक्ष्य चार गडी गमावून १९ चेंडू राखून पार केले.
या विजयासह T20 आंतरराष्ट्रीय सामन्यांमध्ये भारताचा हा सलग 12 वा विजय आहे. यासह भारताने सलग सर्वाधिक टी-२० जिंकण्याच्या विश्वविक्रमाची बरोबरी केली आहे. अफगाणिस्तानने 2018-19 मध्ये सलग 12 टी-20 सामने जिंकले. याशिवाय रोमानियाने सलग 12 सामने जिंकले असले तरी त्यांना कसोटी क्रिकेट खेळण्याचा दर्जा नाही.
भारताने T20 वर्ल्डमध्ये आयर्लंड, नामिबिया आणि अफगाणिस्तानलाही पराभूत केले होते. यानंतर न्यूझीलंड, वेस्ट इंडिज आणि श्रीलंकेला प्रत्येकी तीन सामन्यांत पराभव पत्करावा लागला आहे. भारताने घरच्या भूमीवर टी-20 प्रकारात सलग सातवी मालिका जिंकली आहे. भारताने तिसर्‍या आणि शेवटच्या T20 मध्ये श्रीलंकेचा सहा गडी राखून पराभव केला. यासह टीम इंडियाने टी-20 मालिकाही 3-0 ने जिंकली आहे.
भारताने पहिला T20 62 धावांनी आणि दुसरा T20 सात विकेट्सने जिंकला. रोहित शर्माच्या नेतृत्वाखाली हा सलग चौथा मालिका विजय आहे, ज्यामध्ये भारताने विरोधी संघाचा क्लीन स्वीप केला आहे. याआधी टीम इंडियाने न्यूझीलंडचा घरच्या टी-20 मालिकेत 3-0, वेस्ट इंडिजविरुद्धच्या वनडे आणि टी-20 मालिकेत 3-0 आणि आता श्रीलंकेविरुद्ध 3-0 असा धुव्वा उडवला आहे.
श्रेयसने श्रीलंकेविरुद्धच्या तीन टी-20 सामन्यांमध्ये 204 धावा केल्या. त्यात तीन अर्धशतकांचा समावेश आहे. यादरम्यान त्याचा स्ट्राइक रेट १८० च्या वर राहिला. त्याने पहिल्या सामन्यात 28 चेंडूत नाबाद 57, दुसऱ्या सामन्यात 44 चेंडूत नाबाद 74 आणि तिसऱ्या सामन्यात 45 चेंडूत नाबाद 73 धावांची खेळी केली.
श्रेयसने तीन सामन्यांच्या द्विपक्षीय T-20 मालिकेत भारतीय खेळाडूने सर्वाधिक धावा करण्याचा विक्रमही मोडला. श्रेयसच्या आधी हा विक्रम विराट कोहलीच्या नावावर होता. त्याने 2016 मध्ये ऑस्ट्रेलियाविरुद्ध त्यांच्या घरच्या मैदानावर तीन सामन्यांत 199 धावा केल्या होत्या.