पुणे: पुणे, पिंपरी-चिंचवड आणि उर्वरित ग्रामीण भागातील प्रत्येक महाविद्यालयात जिल्हा प्रशासनाकडून नवमतदार नोंदणीसाठी खास अधिकारी नियुक्त करण्यात आला आहे. त्यामुळे पुण्यातून जास्तीत जास्त नवमतदारांची नोंदणी होऊ शकणार आहे. पुणे, पिंपरी-चिंचवड आणि उर्वरित ग्रामीण भागातील तब्बल ४४२ महाविद्यालयांमध्ये जिल्हा प्रशासनाकडून नवमतदार नोंदणीसाठी समन्वय अधिकारी नियुक्त करण्यात आले आहेत. आगामी लोकसभा आणि विधानसभा निवडणुका डोळ्यासमोर ठेवून पुण्यातून जास्तीत जास्त नवमतदारांची नोंदणी करण्यासाठी हा उपक्रम हाती घेण्यात आला आहे.
राज्यासह देशाच्या विविध भागांतील विद्यार्थी शिक्षणासाठी पुण्यात दरवर्षी दाखल होतात. या विद्यार्थ्यांना मतदान प्रक्रियेत सामावून घेण्यासाठी महाविद्यालयात प्रवेशावेळी मतदार म्हणून नोंदणी करणे बंधनकारक करण्यात आले आहे. याबाबतचे आदेश राज्य सरकारने दिले आहेत. त्यानुसार पुणे, पिंपरी-चिंचवड आणि उर्वरित ग्रामीण भागातील ४४२ महाविद्यालयांमध्ये जिल्हा प्रशासनाकडून नवमतदारांच्या नोंदणीसाठी समन्वय अधिकारी नियुक्त करण्यात आले आहेत. तसेच प्रत्येक महाविद्यालयाने देखील त्यांच्या स्तरावर नवमतदार नोंदणीसाठी एका अधिकाऱ्याची नेमणूक करण्याचे आदेश देण्यात आले आहेत. या अधिकाऱ्यांकडून महाविद्यालयातील विद्यार्थ्यांची मतदार म्हणून नोंद करून घेण्यात येत आहे. याबाबत बोलताना जिल्हाधिकारी तथा जिल्हा निवडणूक अधिकारी डॉ. राजेश देशमुख म्हणाले, ‘सध्या मतदार यादी विशेष संक्षिप्त पुनरिक्षण कार्यक्रम सुरू आहे. या कार्यक्रमांतर्गत शहरासह जिल्ह्याची प्रारूप मतदार यादी प्रसिद्ध करण्यात आली आहे. या यादीवर हरकती, आक्षेप स्वीकारण्याचे काम सुरू आहे. या कालावधीत नवमतदारांची जास्तीत जास्त मतदार म्हणून नोंद होण्यासाठी जिल्हा प्रशासनाकडून खास उपक्रम, शिबिर राबविण्यात येत आहेत.
must read
