मुंबई : तेल कंपन्यांनी शनिवारी पेट्रोल आणि डिझेलचे नवे दर जाहीर केले. आज 2 एप्रिल रोजी पुन्हा एकदा पेट्रोल आणि डिझेलच्या दरात वाढ करण्यात आली आहे. याआधी शुक्रवारी दिलासा मिळाला असून दरात कोणताही बदल करण्यात आलेला नव्हता, मात्र आज पेट्रोल आणि डिझेलच्या दरात 80 ते 80 पैशांची वाढ नोंदवण्यात आली. दिल्लीत पेट्रोलचे दर 80 पैशांनी वाढले आहेत, तर दिल्लीत डिझेलच्या दरातही 80 पैशांनी वाढ झाली आहे. या दरवाढीनंतर दिल्लीत आता एक लिटर पेट्रोलचा दर 102.61 रुपये आणि डिझेलचा दर 93.87 रुपये झाला आहे.
मुंबईत पेट्रोल आणि डिझेलच्या दरात 85 पैशांनी वाढ झाली असून, पेट्रोल आणि डिझेलचे दर अनुक्रमे 117.57 रुपये आणि 101.79 रुपये प्रति लिटरवर पोहोचले आहेत. तर चेन्नईत पेट्रोलच्या दरात 76 पैशांनी वाढ झाली असून आता ते 108.21 रुपये प्रति लीटर आणि डिझेल 98.28 रुपये प्रति लिटरने विकले जात आहे. कोलकातामध्ये पेट्रोल 84 पैशांनी तर डिझेल 80 पैशांनी वाढले आहे. यानंतर येथे एक लिटर पेट्रोल 112.19 रुपये आणि डिझेल 97.02 रुपये प्रति लिटरने विकले जात आहे.
बंगळुरूमध्ये एक लिटर पेट्रोलची किंमत 108.14 आणि एक लिटर डिझेलची किंमत 92.05 आहे. दरम्यान, भोपाळमध्ये एक लिटर पेट्रोल 115.09 आणि एक लिटर डिझेल 98.28 ला विक्री होत आहे. राजस्थानच्या श्रीगंगानगरमध्ये एक लिटर पेट्रोल 119.85 रुपये आणि डिझेल 102.48 रुपयांना विकले जात आहे. रांचीमध्ये पेट्रोल 105.85 आणि डिझेल 99.09 रुपयांवर पोहोचले आहे. लखनऊमध्ये पेट्रोल आणि डिझेल अनुक्रमे 102.45 आणि 94.02 रुपये प्रति लिटर मिळत आहे.
शुक्रवारआधी गुरुवारी पेट्रोल आणि डिझेलच्या दरात प्रतिलिटर 80 पैशांनी वाढ झाली होती. तब्बल 137 दिवसांनंतर 22 मार्च रोजी पेट्रोल आणि डिझेलच्या दरात वाढ करण्यात आली. त्यानंतर 12 दिवसांत 10 दिवस पेट्रोल आणि डिझेलचे दर वाढले आहेत. या दरम्यान प्रति लिटर सुमारे 7.20 ची वाढ झाली आहे. याशिवाय, राष्ट्रीय राजधानीत शुक्रवारी सीएनजीच्या दरात प्रति किलो 80 पैशांनी वाढ करण्यात आली, तर पाइप एलपीजीच्या दरात प्रति घनमीटर 5 रुपये वाढ करण्यात आली.
