PBKS vs RCB : विराट कोहलीच्या (Virat Kohli) नेतृत्वाखाली आरसीबी संघ (PBKS vs RCB) वेगळ्या उर्जेने खेळला आणि सामान्यपेक्षा कमी धावसंख्येचा बचाव करत उत्कृष्ट कामगिरी केली. संघाने 24 धावांनी विजय मिळवला. आयपीएल 2023 मध्ये आरसीबी संघ विजयी मार्गावर परतला आहे. विराट कोहलीच्या नेतृत्वाखाली बंगळुरूने पंजाब किंग्जचा त्यांच्या घरच्या मैदानावर 24 धावांनी पराभव केला.
या सामन्यात आरसीबीने प्रथम फलंदाजी करताना 174 धावा केल्या. प्रत्युत्तरात पंजाबचा संघ 150 धावांवर गारद झाला आणि सामना गमावला. आरसीबीचा या स्पर्धेतील हा तिसरा विजय आहे. आता पंजाब आणि आरसीबी या दोन्ही संघांचे सहा सामन्यांनंतर सहा गुण झाले आहेत. पॉइंट टेबलमध्ये आरसीबी पाचव्या तर पंजाब सातव्या क्रमांकावर आहे.
या सामन्यात आरसीबीकडून विराट कोहली (Virat Kohli) आणि फाफ डुप्लेसिसने अर्धशतके केली. त्याचवेळी प्रभसिमरन सिंग आणि जितेश शर्मा यांनी पंजाबकडून चांगली खेळी खेळली. पण दोघेही अर्धशतक हुकले आणि आपल्या संघाला सामना जिंकून देऊ शकले नाहीत. आरसीबीकडून सिराजने चार विकेट घेतल्या आणि तो सामनावीर ठरला.
आरसीबीचा नियमित कर्णधार फाफ डुप्लेसिस या सामन्यात पूर्णपणे तंदुरुस्त नसल्याने संघाची कमान कोहलीच्या हाती होती. मात्र, डुप्लेसिस फलंदाजीला आला आणि कोहलीने संघाला चांगली सुरुवात करून दिली. त्याने 31 चेंडूत आपले अर्धशतक पूर्ण केले. यानंतर कोहलीनेही 40 चेंडूत 50 धावा पूर्ण केल्या. दोघांनी पहिल्या विकेटसाठी 97 चेंडूत 137 धावांची भागीदारी केली. 47 चेंडूत 59 धावा करून कोहली बाद झाला. पण डुप्लेसिस मात्र स्थिर राहिला. कोहली बाद झाल्यानंतर मॅक्सवेलही बाद झाला. कार्तिक, लोमरोर काही विशेष करू शकले नाहीत. डुप्लेसिस 56 चेंडूत 84 धावा करून बाद झाला आणि आरसीबीने 4 बाद 174 धावा केल्या.
पहिल्या विकेटसाठी कोहली व डुप्लेसिस यांच्यातील शतकी भागीदारीनंतर आरसीबीला 200 धावा करणे अवघड नव्हते. मात्र, अर्शदीप सिंग आणि सॅम करन यांनी शेवटच्या ओव्हर्समध्ये शानदार गोलंदाजी केली. हरप्रीत ब्रारनेही दोन बळी घेतले. शेवटच्या चार ओव्हरमध्ये आरसीबीच्या चारही विकेट पडल्या आणि या संघाला ३७ धावा करता आल्या. अर्शदीप सिंग आणि नॅथन एलिस यांना प्रत्येकी एक विकेट मिळाली.
175 धावांच्या लक्ष्याचा पाठलाग करताना पंजाबची सुरुवात खराब झाली. दुसऱ्या चेंडूवरच अर्थव तायडे सिराजचा बळी ठरला. हसरंगाने डावाच्या तिसऱ्या ओव्हरमध्ये मॅथ्यू शॉर्टलाही बाद केले. लिव्हिंगस्टोन दोन धावा करून सिराजचा दुसरा बळी ठरला. 27 धावांवर पंजाबच्या तीन विकेट पडल्या. मात्र, प्रभसिमरन सिंग एका बाजून होता तरी त्याला साथ मिळाली नाही. हरप्रीत भाटिया 13 आणि सॅम करन 10 धावा करून धावबाद झाले. पंजाबचा निम्मा संघ 76 धावांवर पॅव्हेलियनमध्ये परतला होता.
यानंतर प्रभसिमरन आणि जितेश शर्मा यांनी 21 धावा जोडल्या, मात्र 30 चेंडूत 46 धावा करून प्रभसिमरन सिंगही बाद झाला. यानंतर पंजाबच्या विकेट्स ठराविक अंतराने पडत राहिल्या. हरप्रीत ब्रार 13 धावांवर आणि नॅथन एलिस एका धावेवर बाद झाला. मात्र जितेश शर्माने सुरेख खेळी केली. 17 ओव्हर्सनंतर पंजाबची धावसंख्या सात गड्यांच्या मोबदल्यात 145 अशी होती आणि या संघाला विजयासाठी तीन ओव्हरमध्ये 30 धावांची गरज होती.
सिराजने 18 वी ओव्हर टाकून सामना फिरवला. या ओव्हरमध्ये त्याने केवळ चार धावा दिल्या आणि दोन बळी घेतले. सिराजने हरप्रीत ब्रार आणि नॅथन एलिस यांना बाद करत सामना बेंगळुरूच्या बाजूने वळवला. पुढील ओव्हरमध्ये जितेश शर्माही मोठा फटका खेळण्याच्या प्रयत्नात बाद झाला आणि पंजाबच्या संघाने 24 धावांनी सामना गमावला.
जितेश शर्मा 27 चेंडूत 41 धावा करून बाद झाला. आरसीबीकडून सिराजने चार विकेट घेतल्या. हसरंगाने दोन गडी बाद केले. पार्नेल आणि हर्षल पटेल यांना प्रत्येकी एक विकेट मिळाली.
