Lumpy Update : लम्पी स्किन (Lumpy Skin) या घातक आजाराचा धोका सातत्याने वाढत चालला आहे. बाधित जनावरांची संख्या वाढत चालल्याने या आजाराला अटकाव करण्यासाठी ठोस उपाययोजना हाती घेण्यात आल्या आहेत. जनावरांची वाहतूक (Animal Transport) बंद करण्यात आली आहे. जनावरांचे लसीकरण, रोगनमुने गोळा करणे, बाधित जनावरांवर उपचार करणे या महत्वाच्या उपाययोजना वेगाने केल्या जात आहेत. असे असतानाही दुसरीकडे मात्र या आजाराचा विळखा घट्ट होत चालला आहे. या आजारामुळे आतापर्यंत नगर जिल्ह्यातील (Lumpy Skin In Ahmednagar District) तब्बल 2488 जनावरे बाधित झाली आहेत. पशुसंवर्धन विभागाने तातडीने उपचार सुरू केल्याने यातील 1222 जनावरे बरी झाली आहेत. तर 93 जनावरांचा मात्र मृत्यू झाला आहे. जनावरांच्या मृत्यूच्या संख्येत वाढ होत असल्याने पशुपालकांत भीतीचे वातावरण आहे.
राज्यात अनेक ठिकाणी या आजाराने बाधित जनावरे आढळली आहेत. काही जनावरांचा मृत्यूही झाला आहे. नगर जिल्ह्यात आजार वेगाने फैलावत आहे. आजार आटोक्यात आणण्यासाठी राज्यातील पशुधनाचे लसीकरण (Animal Vaccination) करण्याचा निर्णय घेण्यात आला आहे. तसेच जनावरांचे बाजार बंद केले आहेत. जिल्ह्यात गोजातीय प्रजातींची बाधित असलेली कोणतीही जिवंत किंवा मृत गुरे व म्हशी गोजातीय प्रजातींच्या कोणत्याही बाधित झालेल्या प्राण्याच्या संपर्कात आलेली कोणत्याही प्रकारची वैरण, प्राण्याच्या निवाऱ्यासाठी असलेले गवत किंवा अन्य साहित्य किंवा असे प्राणी नियंत्रित क्षेत्राच्या बाहेर नेण्यासाठी मनाई करण्यात आली आहे.
दरम्यान, बाधित जनावरांवर उपचार सुरू आहेत. दिलासादायक म्हणजे बाधित 2488 जनावरांपैकी 1222 जनावरे या घातक आजारातून बरी झाली आहेत. सध्या 1266 जनावरांवर उपचार सुरू आहेत. जिल्ह्यात हा आजार अद्याप आटोक्यात आलेला नाही. आजाराचा फैलाव आधिक वाढू नये यासाठी जनावरांचे लसीकरण करण्यात येत आहे. आतापयर्यंत 7 लाख 39 हजारांपेक्षा जास्त जनावरांचे लसीकरण करण्यात आले आहे. पशुसंवर्धन विभागाकडून जनावरांचे मोफत लसीकरण करण्यात येत आहे. लसीकरण मोहिमेने जिल्ह्यात वेग घेतला आहे.
