Lok Sabha Election : आगामी लोकसभा निवडणुकीमध्ये सत्ताधारी भाजपने एकट्याने 370 आणि एनडीएच्या मित्रपक्षांना 400 जागांचे लक्ष्य गाठण्यासाठी तयारी केली आहे. यामुळे भाजपने आगामी लोकसभा निवडणुकीच्या तारखा जाहीर होण्यापूर्वीच 267 उमेदवारांची नावे जाहीर केली आहेत.
गेल्या निवडणुकीत भाजपने 436 जागा लढवल्या होत्या आणि त्यांना 303 जागा मिळाले तर 37.7 टक्के वोट शेअर होता. मात्र, एनडीएला 45 टक्के मते मिळाली होती. यामुळे भाजपला 370 जागा जिंकण्यासाठी आणखी 67 जागा जिंकाव्या लागतील. यासाठी आता भाजपने ब्ल्यू प्रिंटही तयार केली आहे. गेल्या निवडणुकीच्या तुलनेत या लोकसभा निवडणुकीत देशातील प्रत्येक बूथवर 370 हून अधिक मते मिळवण्याच्या रणनीतीवर भाजप काम करत आहे.
48 टक्के मते मिळविण्यासाठी सर्वतोपरी प्रयत्न
तरुण मतदारांमध्ये, विशेषत: पहिल्यांदा मतदान करणारे, गरीब, विशेषत: सरकारी कल्याणकारी योजनांचा लाभ घेणारे लाभार्थी, तसेच महिला आणि शेतकरी यांच्यामध्ये पक्षाचा प्रभाव वाढवण्याची पक्षाची योजना आहे. पक्षाच्या रणनीतीचा सर्वात मोठा आधार आणि निवडणूक प्रचाराचा केंद्रबिंदू म्हणजे पंतप्रधान नरेंद्र मोदी यांची लोकप्रियता. वास्तविक, देशातील सर्व राज्यांमध्ये जास्तीत जास्त जागा जिंकण्याचा भाजपचा प्रयत्न आहे.
परंतु, 303 ते 370 पर्यंत पोहोचण्यासाठी पक्ष उत्तर प्रदेश, पश्चिम बंगाल, तेलंगणा, आंध्र प्रदेश, केरळ, तामिळनाडू, ओडिशा आणि पंजाबवर विशेष लक्ष ठेवून आहे. त्याचवेळी झारखंड, छत्तीसगड आणि मध्य प्रदेशमधील लोकसभेच्या सर्व जागा जिंकण्याचा भाजपचा प्रयत्न आहे.
सर्वात जास्त अपेक्षा यूपीकडून
भाजपला यावेळी उत्तर प्रदेशातून जागा वाढण्याची सर्वाधिक आशा आहे. उत्तर प्रदेशमध्ये, 2019 मध्ये, भाजपने राज्यातील 80 पैकी 78 जागा लढवल्या होत्या आणि 2 जागा सहयोगी अपना दल (एस) ला दिल्या होत्या. सपा-बसपा युतीमुळे गेल्या निवडणुकीत भाजपने एकट्याने 62 जागा जिंकल्या होत्या. मात्र, त्यानंतरच्या पोटनिवडणुकीत भाजपने आझमगड आणि रामपूर लोकसभा जागा सपाकडून हिसकावून घेतल्या. यावेळी उत्तर प्रदेशात विजयाचा नवा विक्रम रचू शकेल, अशी पक्षाला आशा आहे.
पश्चिम बंगालमध्ये, 2019 मध्ये, भाजपने राज्यातील सर्व 42 जागा लढवल्या आणि 40.64 टक्के मतांसह 18 जागा जिंकल्या. यावेळी लोकसभा गमावलेल्या 24 जागांसाठी भाजप नव्या जोमाने आणि रणनीतीने तयारी करत आहे. संदेशखळी आणि शहाजहान शेख प्रकरणांमध्ये ममता बॅनर्जी पूर्णपणे उघडकीस आल्या असून राज्यातील जनता यावेळी भाजपला पूर्ण पाठिंबा देईल, असे पक्षाला वाटते.
ओडिशात बिजू जनता दलाशी युती होण्याची शक्यता
2019 च्या लोकसभा निवडणुकीत 38.88 टक्के मतांसह ओडिशातील 8 लोकसभेच्या जागा जिंकणाऱ्या भाजपला यावेळीही या राज्यात जागांची संख्या वाढण्याचा विश्वास आहे. पक्षाच्या सूत्रांवर विश्वास ठेवला तर बिजू जनता दलाशी चर्चा अंतिम टप्प्यात पोहोचली आहे. ओडिशात भाजप आणि एनडीए आघाडीला मोठा फायदा होणार आहे.
चंद्राबाबू नायडू आणि पवन कल्याण आंध्र प्रदेशात एनडीए आघाडीत सामील झाल्यामुळे, यावेळी भाजपला या दक्षिण भारतीय राज्याकडून मोठ्या अपेक्षा आहेत. आंध्र प्रदेशात टीडीपी 17, भाजप 6 आणि जनसेना पक्ष 2 जागांवर निवडणूक लढवणार आहे. गेल्या निवडणुकीत आंध्र प्रदेशात एकही जागा जिंकू न शकलेल्या भाजपला यावेळी 6 जागा मिळाल्याबद्दल प्रचंड उत्सुकता आहे.
दक्षिण अजूनही आव्हान
गेल्या लोकसभा निवडणुकीत भाजपला केरळमध्ये 13 टक्के आणि तामिळनाडूमध्ये 3.62 टक्के मते मिळाली होती. मात्र, याचे रूपांतर जागांमध्ये होऊ शकले नाही. यावेळी डाव्या आघाडी आणि काँग्रेसने राष्ट्रीय पातळीवर एकत्र येऊन केरळमध्ये स्वतंत्रपणे लढल्याचा नकारात्मक संदेश राज्यातील जनतेत जात असल्याचे पक्षाला वाटते. त्याचवेळी, गेल्या काही दिवसांपासून विविध राजकीय पक्षांचे नेते आणि ख्रिश्चन समाजातील प्रभावशाली व्यक्तींनी पक्षात प्रवेश घेतल्याने राज्यात भाजप आणखी मजबूत होताना दिसत आहे.
तामिळनाडूमध्ये अण्णाद्रमुकचे दोन गटातमध्ये विभाजन झाल्याने आणि राज्यातील सत्ताधारी पक्ष द्रमुकच्या नेत्यांकडून सनातन आस्थाबाबत करण्यात येत असलेल्या वक्तव्यांमुळे राज्यातील जनतेमध्ये संताप वाढत आहे. तमिळनाडूमधून लोकसभा निवडणूक लढवण्यासाठी पक्षाने आपल्या एका मजबूत राष्ट्रीय नेत्याला उमेदवारी देण्याचीही योजना आखली आहे.
तेलंगणातील गेल्या निवडणुकीत भाजपने राज्यातील 17 लोकसभेच्या 4 जागांवर 19.65 टक्के मतांनी विजय मिळवला होता. नुकत्याच विधानसभा निवडणुका जिंकून काँग्रेसने राज्यात सरकार स्थापन केल्यानंतर, भाजप आता बीआरएसला पराभूत करून राज्यात पुढे जाऊ शकेल अशी आशा आहे.
पंजाबमध्ये दीर्घकाळ अकाली दलाशी युती करून निवडणूक लढवणाऱ्या भाजपने गेल्या वेळी ३ जागांवर लढून २ जागा जिंकल्या होत्या. पण, यावेळी राज्यातील सर्व 13 लोकसभेच्या जागांसाठी पक्ष पूर्ण ताकदीनिशी तयारी करत आहे. कॅप्टन अमरिंदर सिंग, सुनील जाखर आणि प्रनीत कौर या नेत्यांच्या आगमनाने राज्यात भाजपचा जनाधारही वाढला आहे.
भाजपचा पराभव करण्यासाठी केजरीवाल तयार? केली ‘ही’ मोठी घोषणा
2019 मध्ये, भाजपने झारखंडमध्ये लोकसभेच्या 14 पैकी 11, छत्तीसगडमध्ये 11 पैकी 9 आणि मध्य प्रदेशातील 29 पैकी 28 लोकसभेच्या जागा जिंकल्या होत्या. यावेळी या तिन्ही राज्यांतील सर्व जागा जिंकण्याचा पक्ष सर्वतोपरी प्रयत्न करत आहे.
