Tomato Chat : सध्या फास्ट फूडचं कल्चर मोठ्या प्रमाणात वाढलं आहे. फास्ट फूड दुकाने ठिकठिकाणी दिसतात. चाटच्या दुकानांवर तर प्रचंड गर्दी असते. घरी असे खाद्यपदार्थ तयार करता येत नाहीत केले तरी चव तशी येत नाही. त्यामुळे खाद्यपदार्थांच्या दुकानांवर गर्दी दिसून येते. पण, जर हेच पदार्थ तितक्याच चवीचे जर घरी तयार करता आले तर. आयडीया खास आहे पण आमच्याकडे रेसिपीही तशीच आहे.
जर तुम्हाला चाट खाण्याची आवड असेल आणि तुम्हाला संध्याकाळच्या नाश्त्यात विविध प्रकारचे चाट खायला आवडत असतील तर यावेळी बनारसची प्रसिद्ध टोमॅटो चाट तयार करून पहा. तुम्ही आलू टिक्की, पापडी खूप खाल्ले असेल, पण यावेळी बनारसची प्रसिद्ध टोमॅटो चाट घरीच बनवा आणि तोंडाची चव बदला. चला तर मग सोपी रेसिपी माहिती करून घ्या.
साहित्य
4 चिरलेले टोमॅटो
अर्धाकप उकडलेले पांढरे वाटाणे
एक उकडलेला बटाटा
एक चिरलेला कांदा
1 चमचा अद्रक बारीक चिरून
3 ते 4 बारीक चिरलेल्या हिरव्या मिरच्या
बारीक चिरलेली कोथिंबीर
एक चमचा लिंबाचा रस
1 चमचा लाल तिखट
अर्धा चमचा काळे मीठ
1 चमचा जिरे पावडर
अर्धा चमचा गरम मसाला
1 चमचा (चवीनुसार) चिंचेची चटणी
अर्धा चमचा (चवीनुसार) कोथिंबीर चटणी
चवीनुसार मीठ
4 चमचे तेल किंवा तूप
टोमॅटो चाट रेसिपी
टोमॅटो चाट बनवण्यासाठी प्रथम एका पॅनमध्ये तीन चमचे तेल गरम करा. त्यात अद्रक, हिरवी मिरची आणि कांदे घालून कांदे गुलाबी होईपर्यंत परतून घ्या. आता टोमॅटो आणि १/२ चमचा मीठ घालून मंद आचेवर पाच मिनिटे शिजू द्या. नंतर त्यात गरम मसाला, लाल तिखट, जिरेपूड टाकून मध्यम आचेवर दोन ते तीन मिनिटे परतून घ्या. आता त्यात बटाटे घालून दोन मिनिटे परतून घ्या. यानंतर उकडलेले वाटाणे, अर्धा कप पाणी घालून मंद आचेवर दोन मिनिटे शिजू द्या. यानंतर हिरवी चटणी, चिंचेची चटणी, कोथिंबीर आणि चवीनुसार काळे मीठ टाका आणि गॅस बंद करा. आता तयार केलेले साहित्य प्लेटमध्ये ठेवा, नंतर त्यावर बारीक चिरलेला कांदा, मिरची आणि हिरवी कोथिंबीर घाला आणि गरमाोगरम सर्व्ह करा.
