IND vs WI: चहल रचणार इतिहास; मोडणार बुमराहचा ‘हा’ मोठा विक्रम
मुंबई – भारत आणि वेस्ट इंडिज (IND vs West Indies) यांच्यात रविवारी तिसरा आणि शेवटचा टी-20 सामना रंगणार आहे. भारताला कोलकात्याच्या ईडन गार्डन स्टेडियमवर खेळल्या जाणाऱ्या या सामन्याचा शेवट विजयाने करायचा आहे. टीम इंडियाचा इरादा क्लीन स्वीप करण्याचा असेल, तर वेस्ट इंडिजचा संघ या दौऱ्यातील पहिल्या विजयाच्या इच्छेवर असेल. भारताचा अनुभवी लेगस्पिनर युझवेंद्र चहललाही (Yuzvendra Chahal) या सामन्यात विशेष कामगिरी करायला आवडेल.
वेस्ट इंडिजविरुद्धच्या सामन्यात विकेट घेऊन युझवेंद्र चहल टी-20 आंतरराष्ट्रीय क्रिकेटमध्ये सर्वाधिक बळी घेणारा भारतीय गोलंदाज बनेल. या बाबतीत तो वेगवान गोलंदाज जसप्रीत बुमराहला मागे टाकेल. दोन्ही खेळाडूंच्या खात्यात सध्या 66 विकेट जमा आहेत. मात्र, बुमराहने 55 सामन्यांमध्ये इतक्या विकेट घेतल्या आहेत तर चहलने केवळ 52 सामन्यांमध्ये हा आकडा गाठला आहे.
वेस्ट इंडिजविरुद्ध चांगली कामगिरी
चहलच्या मालिकेबद्दल बोलायचे झाले तर, त्याने आतापर्यंत दोन सामने खेळले आहेत आणि एकूण दोन विकेट घेतल्या आहेत, त्यामुळे जर त्याला शेवटच्या सामन्यातही संधी मिळाली तर तो येथे इतिहास रचू शकतो. बुमराहला या मालिकेत विश्रांती देण्यात आली आहे, तर तो श्रीलंकेविरुद्धच्या आगामी टी-20 मालिकेत पुनरागमन करेल.
गेल्या सामन्याबद्दल बोलायचे झाले तर, भारताने वेस्ट इंडिजविरुद्ध आठ धावांनी रोमहर्षक विजय नोंदवला होता. विराट कोहली (52) आणि ऋषभ पंत (52*) यांच्या खेळीच्या जोरावर भारताने 186 धावा केल्या आणि त्यानंतर गोलंदाजांच्या जोरावर वेस्ट इंडिजला 178 धावांवर रोखले.
Kharediwala घेऊन आलोय आलेय इंडियन ईकॉमर्स..!
आंतरराष्ट्रीय T20 मध्ये सर्वाधिक विकेट घेणारे पाच भारतीय खेळाडू
जसप्रीत बुमराह : 66 विकेट्स
युझवेंद्र चहल : 66 विकेट्स
रविचंद्रन अश्विन : 61 विकेट्स
भुवनेश्वर कुमार : 55 विकेट्स
रवींद्र जडेजा : 46 विकेट्स