‘समृद्धी’ आली..! ‘समृद्धी’ महामार्गाचे फक्त 45 किलोमीटरचे काम उरले.. असा असेल महामार्ग..

नागपूर : मुंबई-नागपूर या समृद्धी महामार्गाचे शिर्डीपर्यंतचे काम येत्या फेब्रुवारीपर्यंत पूर्ण होणे अपेक्षित आहे. या टप्प्यातील केवळ 45 किलोमीटरचे काम बाकी आहे. हा सुमारे 530 किलोमीटरचा टप्पा असून, पैकी 485 किलोमीटरचे काम पूर्ण झाले आहे. खरंतर या टप्प्याचे काम पूर्ण करण्यासाठी मे-2021 पर्यंतची डेटलाईन होती, परंतु मधल्या काळात कोरोना संकट आल्याने काही दिवस हे काम बंद राहिल्याने ही डेटलाइन पाळता आली नाही. आता संपूर्ण महामार्गाचे काम डिसेंबर-2022 पर्यंत पूर्ण करावे लागणार आहे..

महाराष्ट्र राज्य रस्ते विकास महामंडळाचे सहव्यवस्थापकीय संचालक अनिलकुमार गायकवाड
यांनी दिलेल्या माहितीनुसार, वाशिम व बुलडाणा जिल्ह्यांत काही मोठ्या पुलांचे काम फेब्रुवारी-2022 पर्यंत पूर्ण करता येणार नाही. त्यामुळे वाहनचालकांना अशा ठिकाणी वळण घेऊन पुढे जावे लागेल. पुलांचे काम पूर्ण होण्यासाठी आणखी चार-पाच महिने लागणार आहेत. या टप्प्यामध्ये असलेल्या औरंगाबाद जिल्ह्यातील एकमेव टनेलचे काम पूर्ण झालेय.

समृद्धी महामार्गाची वैशिष्ट्ये
– सुमारे 55 हजार 322 कोटींचा महत्त्वाकांक्षी प्रकल्प.
– आठ पदरी महामार्गाची रुंदी 22.5 मीटर, तर उंची 4 ते 12 मीटरपर्यंत.
– महामार्गाला संरक्षक भिंत बांधली जाईल. त्यामुळे जनावरे व पादचाऱ्यांना रोडवर येता येणार नाही.
– महामार्गावर कमाल 150 किलोमीटर प्रती तास वेगाने वाहन चालवता येईल. त्यामुळे नागपूर- मुंबई हे 701 किलोमीटरचे अंतर केवळ 8 तासांत, तर नागपूर- औरंगाबाद अंतर 4 तासांत पूर्ण करता येईल.