खळबळजनक..! केडगावातील एकाच कुटुंबातील तिघांची गळफास घेऊन आत्महत्या, पोलिस घटनास्थळी दाखल..

अहमदनगर : कर्जबाजारीपणाला कंटाळून केडगाव उपनगरातील एकाच कुटुंबातील तिघांनी राहत्या घरात गळफास घेऊन आत्महत्या केल्याचा प्रकार समोर आलाय. त्यामुळे केडगाव परिसरात एकच खळबळ उडाली होती.

संदीप दिनकर फाटक (वय 40), त्यांची पत्नी किरण संदीप फाटक (वय 32) व मुलगी मैथिली संदीप फाटक (वय 10) अशी मृतांची नावे आहेत. याबाबत माहिती मिळताच कोतवाली पोलिसांचे पथक घटनास्थळी दाखल झाले. घटनास्थळी पोलिसांना एक सुसाईड नोटही आढळून आली आहे. पोलिसांनी तिन्ही मृतदेह उत्तरिय तपासणीसाठी शहरातील जिल्हा रुग्णालयात हलविले होते.

केडगावातील मोहिनीनगरमधील विठ्ठल कॉलनीत फाटक कुटुंब राहत होते. गळफास घेतलेल्या अवस्थेत आज सकाळी त्यांचे मृतदेह शेजाऱ्यांना आढळून आले. याबाबत तातडीने पोलिसांना कळविण्यात आले.