India Canada Tension : खलिस्तानी दहशतवादी हरदीपसिंग निज्जरच्या हत्येवरून भारत आणि कॅनडा यांच्यातील (India Canada Tension) वाद अजूनही थांबलेला नाही. कॅनडाने आज भारतात (India) काम करणाऱ्या बहुतेक मुत्सद्दींना क्वालालंपूर किंवा सिंगापूरला हलवले आहे. यापूर्वी भारताने राजनयिकांची संख्या कमी करण्यासाठी कॅनडाला (Canada) 10 ऑक्टोबरची मुदत दिली होती. त्यानंतर आणखी वाद नको म्हणून कॅनडाच्या सरकारने हा निर्णय घेतला. शुक्रवारी एका मीडिया रिपोर्टमध्ये ही माहिती देण्यात आली.
कॅनडाच्या खाजगी मालकीच्या टेलिव्हिजन नेटवर्क सीटीव्ही न्यूजचा हा अहवाल अशा वेळी आला आहे जेव्हा भारताने कॅनडाला या आठवड्याच्या सुरुवातीला आपल्या मिशनमधून अनेक राजनयिकांना परत बोलावण्यास सांगितले होते. भारत सरकारने निज्जरच्या हत्येतील सहभागाचा आरोप बिनबुडाचा म्हणून फेटाळून लावला होता त्यानंतर कॅनडाच्या एका वरिष्ठ राजनैतिक राजनयिकाची हकालपट्टी केली होती.
सीटीव्ही न्यूजने सूत्रांच्या हवाल्याने सांगितले की भारत सरकारने कॅनडाला आपल्या देशातील राजनैतिक कर्मचार्‍यांची संख्या समान करण्यासाठी 10 ऑक्टोबरपर्यंत वेळ दिला होता. भारताने 41 राजनयिकांना कमी करण्यास सांगितले असल्याची माहिती याआधीच्या वृत्तांत देण्यात आली होती.
भारतात काम करणार्‍या बहुतेक कॅनेडियन मुत्सद्दींना क्वालालंपूर किंवा सिंगापूरला हलवण्यात आले आहे,” असे अहवालात म्हटले आहे. कॅनडाचे पंतप्रधान जस्टिन ट्रूडो (Justin Trudeau) यांनी भारत सरकारवर आरोप केल्यानंतर काही दिवसांनी हा विभाग म्हणाला की “परिणामी आणि भरपूर सावधगिरीने आम्ही तात्पुरते भारतात कर्मचारी उपस्थिती समायोजित करण्याचा निर्णय घेतला आहे.
भारताने गुरुवारी सांगितले होते की कॅनडाने संख्येत समानता मिळविण्यासाठी देशातील आपली राजनैतिक उपस्थिती कमी करावी आणि काही कॅनडाचे मुत्सद्दी भारताच्या अंतर्गत बाबींमध्ये हस्तक्षेप करत असल्याचा आरोप केला. निज्जर याच्या हत्येवरून दोन्ही देशांमधील संबंध सतत बिघडत चालल्याचे हे स्पष्ट संकेत आहे.
परराष्ट्र व्यवहार मंत्रालयाचे प्रवक्ते अरिंदम बागची म्हणाले की परस्पर राजनैतिक उपस्थितीपर्यंत पोहोचण्याच्या पद्धतींवर चर्चा सुरू आहे आणि भारत या मुद्द्यावर आपल्या भूमिकेचे पुनरावलोकन करणार नाही. अशी माहिती आहे की भारतात कॅनडाच्या मुत्सद्दींची संख्या 62 आहे आणि आता ही संख्या किमान 41 पर्यंत कमी करावी अशी भारताची इच्छा होती. कॅनडाने निज्जरच्या हत्येशी संबंधित कोणतीही माहिती किंवा पुरावे भारताला दिले आहेत का, असे विचारले असता बागची यांनी परराष्ट्रमंत्री एस. जयशंकर यांच्या अलीकडच्या टिप्पण्यांचा हवाला देत म्हटले की जर काही माहिती मिळाली तर त्यावर नक्कीच विचार करण्यास तयार आहोत.
कॅनडावर दबाव वाढेल: केपी फॅबियन
माजी राजनयिक अधिकारी केपी फॅबियन यांनी भारतातून कॅनडाच्या राजदूतांच्या हकालपट्टीवर सांगितले, याचा सरळ अर्थ असा आहे की कॅनडाने एका भारतीय मुत्सद्याची हकालपट्टी करण्याऐवजी आता भारत 41 राजनैतिक अधिकाऱ्यांना बाहेर काढत आहे. त्यामुळे कॅनडावर दबाव वाढेल. त्याचवेळी कॅनडाच्या परराष्ट्र मंत्री मेलानी जोली यांच्या वैयक्तिक चर्चेच्या विनंतीबाबत ते म्हणाले की, राजनैतिक चर्चा नेहमीच खाजगी आणि गोपनीय असतात. येथे वैयक्तिक संभाषण म्हणजे एकमेकांशी थेट बोलणे. कारण, सध्या माध्यमांतून दोन्ही देशांमध्ये चर्चा सुरू आहे.
भारत-कॅनडा वाद ही गुंतागुंतीची बाब: जेम्स रुबिन
ग्लोबल एंगेजमेंट सेंटरचे विशेष दूत जेम्स रुबिन यांनी भारत-कॅनडा वाद हे एक जटिल प्रकरण असल्याचे वर्णन केले आणि म्हटले की अमेरिका दोन्ही सरकारांना मदत करू इच्छित आहे. कॅनडा आधीच तपासात मदत करत आहे.
