नवी दिल्ली : दिल्ली महानगरपालिका निवडणुकीच्या मतमोजणीच्या सुरुवातीच्या ट्रेंडमध्ये आप आघाडीवर आहे, परंतु एक्झिट पोलच्या शक्यतांनुसार, एकतर्फी विजय मिळताना दिसत नाही. भाजप दुसऱ्या क्रमांकावर नक्कीच आहे, पण तो आम आदमी पक्षाच्या फार कमी फरकाने मागे आहे. काँग्रेसची अवस्था वाईट असून दोन्ही पक्षांच्या तुलनेत मोठ्या फरकाने मागे पडून तिसऱ्या क्रमांकावर आहे. एमसीडी निवडणुकीच्या एक्झिट पोलमध्ये, जवळपास सर्व सर्वेक्षण संस्थांनी आम आदमी पार्टी (आप) च्या विजयाचा आणि भारतीय जनता पक्षाच्या (भाजप) 15 वर्षांच्या राजवटीचा अंत होण्याचा अंदाज वर्तवला आहे. एमसीडी निवडणुकीला मुख्यतः उत्साही AAP, आत्मविश्वासपूर्ण भाजपा आणि काँग्रेस यांच्यातील त्रिकोणी लढत म्हणून पाहिले जात होते. दिल्ली महानगरपालिकेत (एमसीडी) 250 प्रभाग आहेत आणि 1349 उमेदवारांचे भवितव्य ईव्हीएममध्ये बंद आहे. मतमोजणीसाठी 42 केंद्रे तयार करण्यात आली आहेत.
दिल्ली महानगरपालिका निवडणुकीत भाजप आपली 15 वर्षांची सत्ता कायम ठेवेल की आम आदमी पार्टी पलटवार करून एमसीडीची सत्ता काढून घेईल ? दिल्ली महापालिकेवर कोणाची सत्ता राहणार हे काही वेळानंतर निवडणूक निकालावरून स्पष्ट होईल. मात्र, निवडणुकीच्या निकालाआधीच आम आदमी पक्ष विजयाबद्दल आत्मविश्वासू दिसत आहे. एमसीडी निवडणुकीच्या मतमोजणीआधीच आम आदमी पक्षाने आपल्या कार्यालयात काही बॅनर-पोस्टर लावले आहेत, ज्यावर घोषवाक्य लिहिले आहे- ‘अच्छे होंगे 5 साल, एमसीडी में भी केजरीवाल.’ मतमोजणी आज सुरू झाली आहे. काही वेळातच निवडणुकीचे कल स्पष्ट होतील.
आम आदमी पक्षाच्या या आत्मविश्वासामागे एक्झिट पोलचे निकाल आहेत. दिल्ली महानगरपालिकेसंदर्भातील बहुतांश एक्झिट पोलमध्ये आम आदमी पक्षाच्या विजयाचा अंदाज वर्तवण्यात आला आहे. बहुतेक एक्झिट पोलने दिल्ली महानगरपालिका निवडणुकीत आम आदमी पक्षाच्या स्पष्ट विजयाचा अंदाज वर्तवला आहे, तर भारतीय जनता पक्ष (भाजप) दुसऱ्या क्रमांकावर राहण्याचा अंदाज वर्तवण्यात आला आहे. ‘इंडिया टुडेच्या एक्झिट पोलनुसार महापालिकेत आम आदमी पार्टीला 149-171 जागा मिळतील, तर भाजपला 69-91 जागा मिळतील. सर्वेक्षणात काँग्रेसला तीन ते सात आणि इतरांना पाच ते नऊ जागा मिळण्याची शक्यता वर्तवण्यात आली आहे. त्याच वेळी, ‘टाइम्स नाऊ पोलमध्ये, AAP ला 146-156 जागा मिळतील, तर भाजपला 84-94, काँग्रेसला 6-10 आणि इतरांना चार जागा मिळण्याची शक्यता वर्तवण्यात आली आहे.
दिल्ली महानगरपालिकेच्या निवडणुका रविवारी पार पडल्या. MCD च्या एकूण 250 प्रभागांसाठी झालेल्या निवडणुकीत 1.45 कोटी मतदारांपैकी 50 टक्क्यांहून अधिक मतदारांनी मतदानाचा हक्क बजावला. जर आजचा निकाल आम आदमी पार्टीच्या बाजूने लागला तर MCD मधील भारतीय जनता पार्टीची 15 वर्षांची सत्ता संपुष्टात येईल. 2007 पासून एमसीडीमध्ये भाजप सत्तेत आहे. 2017 च्या महापालिका निवडणुकीत एकूण 270 पैकी 181 प्रभाग जिंकले होते. आप 48 तर काँग्रेसने 30 वॉर्ड जिंकले.
या वर्षाच्या सुरुवातीला केंद्र सरकारने दिल्लीतील तिन्ही महापालिकांचे एकत्रीकरण केले होते, त्यानंतर प्रभागांची संख्या 250 झाली होती. एमसीडी निवडणुकीत आप आणि भाजप या दोन्ही पक्षांनी प्रत्येकी 250 उमेदवार उभे केले, तर काँग्रेसने 247 आणि 382 अपक्ष उमेदवार उभे होते. बहुजन समाज पक्षाने 132, राष्ट्रवादी काँग्रेसने 26, जनता दल (युनायटेड) 22 आणि एआयएमआयएमने 15 वॉर्डात उमेदवार दिले होते.
- Must Read : Air Pollution in Delhi : केजरीवालांनी मान्य केले ‘ते’ अपयश; थेट पंतप्रधान मोदींना केले ‘हे’ आवाहन
- भारत जोडो नंतर काँग्रेस सुरू करणार ‘ही’ खास मोहिम; पहा, ‘कसे’ घेरणार भाजप सरकारला ?
