Appreciation of India in the world: दिल्ली : भारताने पुन्हा एकदा संयुक्त राष्ट्र यांच्या शांतता मिशनमध्ये (United Nations Mission) महिला शांती सैनिकांची तैनाती वाढवण्याचा निर्णय घेतला आहे. संयुक्त राष्ट्रातील भारताच्या स्थायी प्रतिनिधी रुचिरा कंबोज यांनी याबाबत ट्विट (Ruchira Kamboj tweeted) केले आहे. त्या म्हणतात की, अबेईच्या संवेदनशील प्रदेशातील यूएन मिशनमध्ये आमच्या बटालियनचा भाग म्हणून भारत शांततारक्षकांची सर्व महिला तुकडी तैनात करत आहोत. अलिकडच्या वर्षांत महिला शांतीरक्षकांची ही सर्वात मोठी तैनाती आहे. तुकडीला हार्दिक शुभेच्छा.
अशा पद्धतीने भारताने शांती सेनेत भारतीय महिला तुकडी वाढवल्याने जगभरातून भारताचे कौतुक होत आहे. याबाबत कंबोज यांनी म्हटले आहे की, अबेईमधील महिला शांतीरक्षकांची पलटण 6 जानेवारी 2023 रोजी संयुक्त राष्ट्र अंतरिम सुरक्षा दल, अबेई (United Nations Interim Security Force, Abyei UNISFA) च्या भारतीय बटालियनचा भाग म्हणून तैनात करण्यात आली आहे. निवेदनानुसार 2007 मध्ये लायबेरियामध्ये महिला शांतीरक्षकांची पहिली पलटण तैनात केल्यानंतर यूएन मिशनमध्ये महिला शांतीरक्षकांची ही भारतातील सर्वात मोठी तैनाती आहे.
गेल्या वर्षी 31 ऑक्टोबरपर्यंत बांगलादेशानंतर संयुक्त राष्ट्रांच्या शांतता मोहिमांमध्ये भारत हा दुसरा सर्वात मोठा सैन्य योगदानकर्ता आहे. भारताने एकूण 12 मोहिमांमध्ये हजारो सैनिक आणि जवान पाठवले आहेत. भारतीय मिशनने निवेदनात नमूद केले आहे की जगभरातील यूएन मिशनमध्ये महिला शांतीरक्षकांची भूमिका स्थानिक लोकसंख्येतील महिला आणि मुलांपर्यंत पोहोचण्याच्या आणि त्यांच्याशी संपर्क साधण्याच्या क्षमतेमध्ये महत्त्वपूर्ण आहे. विशेषत: जे संघर्षग्रस्त भागात लैंगिक हिंसाचाराचे बळी आहेत.
