APMC Election : जिल्ह्यातील सात बाजार समित्यांचे निकाल (APMC Election) हाती आले आहेत. नगर तालुका कृषी उत्पन्न बाजार समितीच्या सत्ता कायम राखण्यात जिल्हा बँकेचे अध्यक्ष शिवाजी कर्डिले यांना यश आले आहे. कर्डिले यांच्या गटाने आतापर्यंत 18 पैकी 14 जागा जिंकल्या आहेत.
नगर तालुका बाजार समितीच्या निवडणुकीकडे सर्वांचे लक्ष लागले होते. जिल्हा बँकेचे अध्यक्ष झाल्यानंतर कर्डिले यांच्यासाठी ही पहिलीच निवडणूक होती. कर्डिले यांच्या नेतृत्वात पॅनल होता. त्यांना खासदार सुजय विखे यांचीही साथ मिळाली.
विरोधी महाविकास आघाडीने कर्डिले गटाच्या ताब्यातील सत्ता हिसकावून घेण्यासाठी जोरदार तयारी केली होती. मतदानाच्या वेळेसही दोन्ही गटात चांगलेच खटके उडाले होते. मतदारांना सहलीला नेले जात असल्याचा आरोपही विरोधी गटाकडून केला गेला. मतदानाच्या दिवशी तर मतदारांना घेऊन बस थेट मतदान केंद्रावर आणली गेली. त्यावरही चांगलाच वाद झाला.
या घडामोडींनंतर शनवारी निकाल हाती आले. यामध्ये कर्डिले गटाचे 12 उमेदवार विजयी झाले. दोन जागा आधीच बिनविरोध झाल्या होत्या. त्यामुळे कर्डिले गटाने आतापर्यंत 14 जागा जिंकत बाजार समितीची सत्ता कायम राखली आहे.
पारनेरात लंके-औटीच
नगर जिल्ह्यातील पारनेर बाजार समितीचेही निकाल हाती आले आहेत. या बाजार समितीत मतदारांनी आमदार निलेश लंके आणि माजी आमदार विजय औटी यांच्यावरच विश्वास दाखविला आहे. महाविकास आघाडीने खासदार सुजय विखे, माजी जिल्हा परिषद सदस्य सुजित झावरे यांच्या नेतृत्वातील पॅनलचा पराभव केला आहे.
या निवडणुकीत आतापर्यंत 18 पैकी 15 जागा महाविकास आघाडीच्या खात्यात गेल्या आहेत. त्यामुळे बाजार समितीत महाविकास आघाडीचीच सत्ता आली आहे. बाजार समिती आधीही राष्ट्रवादी काँग्रेसच्याच ताब्यात होती. बाजार समिती आपल्या ताब्यात घेण्यासाठी खासदार सुजय विखे यांनी चांगलाच जोर लावला होता. यात त्यांना सुजित झावरे यांची साथ मिळाली.
खासदार विखे यांचा तालुक्यातील वाढता हस्तक्षेप पाहता त्यांना तालुक्याच्या राजकारणापासून दूर ठेवण्यासाठी एकमेकांचे विरोधी असलेले आमदार निलेश लंके आणि माजी आमदार विजय औटी यांनी बाजार समिती निवडणुकीत हातमिळवणी केली.
प्रचार सभांतूनही त्यांनी जोरदार हल्लाबोल केला होता. या ठिकाणी विखे फॅक्टर चालेल असे बोलले जात होते. मात्र, मतदारांनी त्यांना साफ नाकारत लंके-औटी यांच्या नेतृत्वातील पॅनलला कौल दिला.
